Во Штип кусок, во Берово вишок социјални станови

Тажни или со солзи-радосници вчера околу 150 штипјани ја дочекаа прелиминарната електронска распределба на 91 социјален стан во новоизградениот објект во штипската населба Сењак.

За становите конкурирале 156 штипјани од седум социјално загрозени категории граѓани, од кои валидни документи имале 131. Оние што ги добија становите со радост истакнаа дека го решаваат најсериозниот социјален проблем, а незадоволните, главно повеќедетни семејства, револтирано најавија дека ќе се жалат.

- Ова е прелиминарна распределба. За да се исклучат секакви злоупотреби, ќе бидат посетени сите семејства што на прелиминарната распределба добија стан. Сите незадоволни во Министерството може да извршат увид на документацијата. Становите се дел од владиниот проект за изградба на 1.750 социјални стана. Досега вакви станови беа доделени во Македонска Kаменица, Скопје, Охрид, Kочани, Kичево, Kавадарци и во Kрива Паланка, за десетина дена распределба ќе биде извршена во Битола, а следната година продолжуваме во други општини – рече министерот за транспорт и врски Миле Јанакиевски.

Вчера попладне прелиминарна распределба на станови во новоизградената социјална зграда имаше и во Берово. Таму за 51 стан конкурирале 41 беровец, па од Министерството најавија дека ќе биде распишан уште еден оглас за преостанатите станови. (Љ.Ш.)