СКАНДАЛОЗНИ ПОДАТОЦИ ЗА ЗАБАВИ на младите
Се вртат десетина порноснимки со ученици
Средношколци од Скопје раскажуваат дека меѓу нив кружат десетина порноклипови снимани со мобилни телефони во училишта и во кафулиња
Никој не знае каде учат средношколците што снимале порносцена во училница, но многу ученици го гледале скандалозниот видеоклип и тврдат дека постојат најмалку уште десетина слични, со „актери“ на возраст од 15 до 18 години. Последниот што е раширен кај младите е орален секс помеѓу ученик и ученичка, проследен со аплауз и овации од соученици во училницата. Се претпоставува дека бил сниман во некое скопско училиште. Средношколци тврдат дека се' помасовно се снимаат такви сцени и во кафулињата, а директорите на училиштата не знаат што да преземат за да ја спречат таа негативна појава.
Директорите вчера не го одржаа најавениот состанок и за овој проблем ќе разговараат во наредната недела. Дел од нив признаваат дека веднаш по објавувањето на информацијата дека постои компромитирачки видеолкип на средношколци, ја побарале и ја виделе снимката. Други размислуваат околу училиштата да постават системи што ги блокираат мобилните телефони на учениците додека тие се на настава.
- Засега има најмалку десетина такви клипови. Има еден на кој група средношколци соблекуваат ученичка во втора година. Ја знаеме девојката. Со нас учи. На клипот се гледа дека не е свесна што и' се случува бидејќи само лежи, а момчиња ја соблекуваат и ја допираат секаде. Претпоставуваме дека е или под дејство на дрога или на алкохол. На друг клип е снимена ученичка во кафуле каде неколку момчиња ја соблекуваат и ја допираат. И на таа снимка се гледа дека девојката е во алкохолизирана состојба. За последниот, на кој е снимен орален секс, слушнавме дека учениците се во трета година и учат во една скопска гимназија. За една година ова ќе биде мода, а се' почна кога меѓу нас се рашири порноснимка на средношколци од Хрватска - коментираа вчера ученици од скопско средно училиште.
Средношколка во втора година раскажува како дошла до последниот видеоклип:
- Татко ми ми го покажа. Како негативен пример што прават моите врсници. Бев изненадена и засрамена. Оттогаш, постојано ми го проверува мобилниот телефон.
Претседателката на Здружението на директорите на средните училишта и директорка на гимназијата „Никола Карев“, Горица Илиеска, најави дека проблемот ќе се разгледува деновиве.
- Откако се распрашав за ваквите „активности“ на учениците, открив дека се случувале во две-три скопски училишта, но засега се' е шпекулација и не можам да тврдам ништо. За ова ќе разговараме на седница на сите директори, најверојатно во наредната недела, кога, меѓу другите прашања, ќе го вметнеме и овој проблем. Уште вчера им кажав на моите ученици дека ако некого фатиме со мобилен телефон в училиште, ќе му го одземе до крајот на учебната година - вели Илиеска.
Директорите најавуваат мерки за поголема контрола на учениците на часовите, на одморите, поставување системи за блокада на работата на мобилните телефони, но и забрана за носење и користење в училиште и друго. Предвидени се и вонучилишни активности за предавања за сексуално образование.
Љубица Гроздановска
|
EUR 61.50
AUD 42.50
USD 46.83
GBP 73,63
